روتين العناية بالشفايف Lip care

يا أهلن وسهلن فيكم صديقاتي 

كيفكم .. وكيف الاستعداد للدوام 

اليوم ريفو عن روتيني في العناية بالشفايف 

مع عوامل الجفاف والحر والرطوبة الشفايف  ممكن تتشقق وتعطي شكل بشع 
حتى لو استخدمتي افضل انواع الارواج
بخطوتين ممكن تتجنبين هالمشاكل 
التقشير لانه يزيل الجلد الميت ويوحد اللون و الترطيب يخفف من سواد حول الشفايف 

نبدأ  بصورة جماعية 

من اليمين  1- مقشر 

2- فازلين بفايتمين A , D 

3- مرطب lipobase 

أول خطوة استخدم فازلين بفايتمين A , D 

هذا الفازلين طبي اذا ما كان متوفر عندك ممكن تستخدمين الفازلين العادي من أي صيدلية 

استخدمي طبقة ثقيلة على الشفايف واتركيها لمدة ربع ساعة 

وبعدها امسحي الفازلين 

  الخطوة الثانية : التقشير 

قبل كنت أعتمد المقشر المنزلي بكتب طريقته تحت بس ما كان مثل مقشر لش 

هذا مقشرروعه ما اقدر أوصفه من جماله  ,,تأثيرة سريع ,, يقشر الشفايف بشكل ممتاز 

ريحه المقشر جميلة تذكرني بريحة العلكة 

أستخدمه أكثر من 3 مرات في الاسبوع 

واعتمدته بشكل دائم بعد كل مره استخدم فيها روج غامق .. مثل الأحمر والعنابي 

طريقة استخدامه : ابلل شفايفي بالمويه واحب تكون المويه دافيه 

وبعدها اخذ شوي من المقشر واوزعه على شفايفي وبعدها ابد اقشر باصبعي بشكل خفيف 

دقيقة او دقيقتين 

وفي أنواع ثانيه 

3 أنواع مقشرات من لش 

تقيمي للمنتج 10-10 

السعر : 60 ريال 

يتوفر في : محلات لش 

الرياض : الفيصلية - المملكة 

الخطوة الأخيرة : الترطيب 

استخدم مرطب lipobase  بعد التقشير 

مرطب ثقيل وما يلصق أبد .. بدون ريحه 
يعني استخدمه وانا مطمئنة 

تقيمي له 10-10 

متوفر في صيدلية (كنوز الصحة ) واغلب الصيدليات 

السعر من 30 الى 40 ريال 

ممكن تستخدمين أي مرطب أو زبدة يكون خالي من العطور 

سوي مقشرك بنفسك 

كثير مناطق ما فيها محل لش .. اذا حابه تسوين مقشرك بنفسك

خذي ملعقة سكر بني أو أبيض 

ملعقة عسل 

اخلطيهم سوا وبنفس الطريقة خذي شي بسيط وافركي  شفايفك بنعومه

أخر شي في نقاط حابه انبه عليها 

شفايفك متشققه =  كثري من سرب المويه لانك اذا جسمك جاف اكيد بياثر على شكل شفايفك 

انتبهي لتاريخ صلاحية الأرواج والقلوسات يكون مكتوب عليها بمرع صغير رقم مثلا 6 يعني بعد 6 شهور من تاريخ اول استخدام للمنتج 

المرطبات غالبا ما يكون عليها تاريخ انتهاء صلاحية فلا تجلس عندك أكثر من 8 شهور إلى 12 شهر .. 

بكذا انتهى البوست .. يارب أكون افدتكم ان شاء الله 

سلسلة مستجدة جامعية : اختاري نظام لعنايتك ببشرتك ..

اهلن اهلن بمتابعاتي الجميلات

 كيفكم وكيف كانت انطباعاتكم عن اخر بوست النظافه الشخصيه

 نكمل سوا سلسله مستجده جامعيه نظام تنظيف البشره صباح ومساء

انتي محتاجه 3 خطوات يوميا و4 خطوات اسبوعيا

 تعالي اقول لك كيف؟؟

 يوميا: الخطوه الاولى الغسول

 الخطوه الثانيه التونر

 الخطوه الثالثة الترطيب بالكريم

  اسبوعيا: نفس الخطوات السابقه وزياده عليها تقشير البشره مرتين في الاسبوع كل ثلاث او اربع ايام مثلا الجمعه و الثلاثاء او الخميس و الاثنين

نبدأ بسم الله بأول خطوه وهي الغسول 

الغسول مهم جدا جدا للبشره يزيل البكتيريا والاوساخ اللي تتراكم على وجهك كل اليوم

 الغسول عاده يستخدم مرتين الى 3 مرات

 انا استخدمه الصباح وبعد ما اخلص الدوام بعد الجامعه

مره مهم بعد الدوام!! ليه؟ لازم تنظفي الغبار والاوساخ اللي تعرض لهم وجهك وبرضوا لو انتي تحطين ميك اب خفيف تحتاجين تنظفي بشرتك

 والليل قبل انام

 انواع الغسولات

اضفت كل الغسولات بصوره وحده  

انتي اختاري النوع اللي يناسبك

 شوفي نوع بشرتك واختاري اللي يناسبك

 ممكن اللي يناسبك ما يناسب غيرك واللي يناسب غيرك ما يناسبك

 ننتقل للخطوة الثانيه التونر

(يكون سائل مثل المويه خفيف جدا )

 التونر انواع :

  قابض للمسام وهذا للبشره الدهنيه (هذا النوع لا يستخدم قريب من العينين )

  تونر ملطف للبشره العاديه والجافيه

 اهميه التونر يفتح المسام وينعش البشره يعطيك نضاره وحيويه للوجه

 طريقه استخدامه خذي شوي من السائل وحطيه على قطن الوجه

 وامسحي وجهك بحركه دائريه

اذا وصلتي للجبهه ابدي من النص باتجاه الخارج

 ولا تنسين بقطنه ثانيه تمسحين الرقبه

 انواع التونر  في صورة وحده 

الخطوة الاخيرة : 

 الترطيب وهي اهم خطوه بعد التونر ب5 دقايق

استخدمي كريم مناسب لنوع البشرة 

المقشر 
ليه نتسخدم مقشر !!؟؟
 لأن  ببساطه محتاجين نشيل الخلايا الميته

 المقشر يجدد الطقبه العليا من البشره

 بيعطي بشرتك نضاره حلوه

 طريقه استخدامه من مره الى مرتين في الاسبوع خذي كميه شويه من المقشر 

ووزعيه على وجهك وبحركات دائريه خفيفه لمده دقيقه 

وبعدها غسلي وجهك

أنواع مقشرات البشره 
مقشر ستيفز للوجه :من افضل الانواع اللي استخدمتها

 مقشر كلينك 7 days

شوفوا ريفيوا الجميله simplicity is beauty

http://simplicityisbeautyblog.blogspot.com/2013/06/clinique-7day-scrub.html 

 وطبعا لا تنسين واقي الشمس في الجامعه شي مهم جدا جدا

ويحمي بشرتك من اشعه الشمس اللي ممكن تسبب 

النمش البقع الكبيره الغامقه الحروق الخفيفه (يصير لون بشرتك احمر ) و و و الخ 

ونصيحه يابنات لا تقولين انا ما اتعرض للشمس كافي مشوار من البيت للسياره للجامعه

لازم تحمين بشرتك بواقي شمس ويكون 25 او اكثر

انتهى البوست : اعتذر منكم ما قدرت اكتب ريفو عن كل منتج 

لأن انواع البشره تختلف 

وحبيت يكون البوست شامل يستفيد منه الكل 

نصيحتي اذا قررتي تشرين اي منتج 

سوي عليه بحث واقري التجارب ومكوناته  

نجي لآخر فقرة كلمه مني لصحباتي المستجدات 

اول اسبوعين دوام بتكونين مو متاقلمه على الوضع

 وبتقولين ياحلو ايام الثانوي كلنا مرينا بهذي الفتره

ضغط ومجتمع جديد ومواد جديده وصديقات جداد

 لازم تكونين ايجابيه

 رددي كلمات انا اقدر انجح .. هذا مستقبلي

ودايم كنت اقول اللي درسوا نفس تخصصي وتخرجوا من الجامعه

 ايش عندهم مو عندي ؟؟

 عندهم عقل عندك عقل

 عندهم عزيمه واصرار خلي عندك عزيمه واصرار بوجهه كل شي يوقف بطريقك 

اهتمي بنفسيتك ودايم خليك ايجابيه ابعدي عن الناس السلبيه

النقطه الثانيه اهتمي بمعدلك

 السنه التحضيريه حجر الاساس لك في الجامعه

 اهتمي بدراستك بدكتوراتك والاستاذات

 الاستاذات والدكتورات انتبهي تناقشيهم وتطلعيهم غلط او تتطاولين عليها بالكلام 

لان 

 هي اللي بتصحح ورقتك مو احد غيرها ولا احد بيراجع وراها

انتبهي لنفسك في هالنقطه واذا قدرتي بيني للدكتوره انك مجتهده

 في نقطه تنرفزني في البنات اللي يروحون يتشكون للدكتورات

 انا يادكتوره مستواي ضعيف

 انا يادكتوره ما افهم بسرعه

 انا يادكتوره عندي ضغوط في البيت

 ترا هذا كله ما يفيدك بشي غير ان الدكتوره بتحتقرك واحيانا ترحمك

 يعني لا تنتظرين بالفاينل درجتك اكثر من دي بلس الى سي 

الله يوفقكم حبيباتي ويسهل دراستكم واموركم كلها 

لا تنسوني من دعواتكم :$ 

مستجده جامعيه ،، النظافه اهم من المظهر بمنتجات بسيطه

 مستجده جامعيه ،، النظافه اهم من المظهر بمنتجات بسيطه

 ياصباح السعاده والجمال لاجمل متابعات 

كيفكم وكيف تجهيزات الجامعه  نكمل سوا  سلسله مستجدة جامعيه

 بيكون موضوع اليوم عن النظافه الشخصيه

 الموضوع حساس شوي بس والله يستاهل نتكلم فيه... ولاني احبكم بتكلم فيه بتفصيل شوي

 كثير بنات غافلين عن هالموضوع كثير عانوا من صديقات

قلبوهم اطيب من الطيب

واشكالهم مرتبه وجميلين

 بس الريحه لا تعليق تخليك تنفرين منها غصب  وما تقدرين تجلسين معها

 ليه تكونين وحده منهم؟؟

كل المطلوب خطوات بسيطه ما تاخذ منك وقت 

 الجامعه مو مثل المدرسه جالسه بكرسيك وتنزلين للبريك وخلاص :(

 لا الجامعه تتنقلين من مبنى لمبنى بالحر ووتحت الشمس

وجسمك يفرز عرق يسبب روائح كريهه

 في بنات ما يحسوا بهذي الريحه لان خشمك تعود عليها

وبالتالي ما تحسين بس غيرك يتضايق منك وممكن تخسرين ناس بسبب اهمالك

خذيها قاعده المويه والصابون ما يسون شي لحالهم

في كم نقطه ودي اتكلم فيها اولا لازم تتروشين كل يوم وتستخدمين

1 -الصابون السائل( الشاور جل)

 لازم لازم لازم تستخدمينه يوميا كل يوم تاخذين شاور وتستخدمينه

 لان المويه ما تزيل العرق والبكتيريا اللي تسبب الريحه الكريهه

في خيارات كثيره عندك بس انصحك باستخدام صابون ديتول السائل للجسم

 قبل لا تستخدمين الشاور جل المعطر

 (اقصد بالشاور جل المعطر اللي هو غسول الجسم المعطر اللي من باث اند بودي وركس ومن بودي شوب ومن زهور الريف وشاور جل بنفس ماركه عطرك ووو الخ )

لان ديتول بيقتل البكتيريا وينظف الجسم وبعدها استخدمي الشاور جل المعطر لتعطير جسمك

 2-مزيل رائحه العرق (ديودرنت)

يستخدم مرتين في اليوم مره بعد الشاور ومره قبل تلبسين للجامعه

لا تقولون لي يسبب سرطان بعيد الشر و و و الخ

لا مزيل رائحه العرق يفرق عن مزيل العرق  كيف؟

مزيل رائحه العرق

 بتلاقين مكتوب عليه 7 ساعات

 وهو يزيل الرائحه

 مزيل العرق

 بتلاقين مكتوب عليه 24 ساعه

 وهذا يسكر المسام ويمنع العرق

 افضل المزيلات اللي استخدمتها

    

 مزيل ليدي سبيد ستيك برائحة التفاح

 يعطي شعور بالانتعاش جميل جميل

 يحسسك انك فريش وطبعا يزيل ريحه العرق الكريهه

 متوفر في كل الصيدليات والسوبرماركت

سعره من 13 الى 17 ريال

(أنا معتمده هذا الديودرنت من المتوسط مريح جدا )

 مزيل دوف

استخدمت نوعين الازرق وكان روعه وريحته خفيفه وفرش

 الثاني اللي غطاه ذهبي ريحته قويه وكرريهه ما حبيتها ابد

 سعره 12 ريال

 متوفر في كل الصيدليات والسوبرماركت

الصورة من قوقل 

مزيل بيزلين

هذا للناس اللي تقول نخاف من المواد الكميائيه مزيل طبيعي 100%

 ويبيض المنطقه اول ما استخدمه فيه ريحه غريبه 10 دقايق وتروح بس ما قدرت اتحملها

 انا اخذت اللي بدون رائحه يمكن اللي برائحه غير

سعره 46 ريال

يتوفر في   كل الصيدليات

* ما انصحك ابد بمزيلات معطره مثل مزيلات بودي شوب و نكتار وزهور الريف الخ

 *انصح باستخدام مزيل العرق على شكل بودره من كل المزيلات اللي ذكرتها فوق  ما عاد بيزيلين مافي الا رول 

لأن الرول السائل والبخاخ اقل تاثير

 3-ازاله شعر  الاندر ارام  (الابط)

الحلاوة 

المفروض كل اسبوعين تشيلين هذي المنطقه وتنظفينها

 لان شعر ومنطقه مكتومه بتسبب الريحه الكريهه

الليزر

 اذا قدرتي تسوينها ليزر وترتاحين برضوا افضل

  

شفرات

 ما تقدرين لا حلاوه ولا ليزر في موس من جاليت للبنات لونه أورنج

  بس ممكن يسبب لك سواد في المنطقه

شمع 

 شرائح شمع فيت سهله وفي نوع مخصص لهذي المنطقه

 سعر شرائح فيت 38 ريال

 تتوفر في كل الصيدليات والسوبرماركت الكبيره الدانوب كارفور بنده

 4- التقشير الخفيف 

انا لما اسوي تقشير لجسمي اخذ شوي من المقشر وامسح على منطقه الاندر ارام

 مسح خفيف مو فرك

تنظف المنطقه وتنتعش

استخدم مقشر سوب اند قلوري حلو وفي كميه ترطيب تكلمت عنه في بوست توحيد لون الجسم 

 العطر انتبهي تستخدمين عطر على عرق لان الريحه بتنشر مقرفه العطر على نظافه عشان يبين جمال ريحه خطوات بسيطه تخليك بنت نظيفه وانيقه

ملخصها بثلاث خطوات 1- شاور بالصابون 2- مزيل عرق يوميا 3-  وازاله الاندر ارام باستمرار

انتهى البوست 

مثل ما وعدتكم في البوست الأول كل بوست بكتب فيه كلمه لمستجدات الجامعه 

اليوم بتكلم عن صديقات الجامعه 

وانتي داخله الجامعه بتقابلين بنات اشكال وألوان 

من كل الطبقات وكل المستويات  .. لا تتعلقين بأول صديقات تقابلينهم أول الأيام 

دايم نسمع بنات الجامعه مصلحجيات ويدورون مصلحتهم 

هذا الكلام صحيح بنسبه 50% 

و وبالمقابل بعد في بنات بتحبينهم ويحبونك بدون مصلحه 

بتخلصين لهم بكل شي وبيخلصون لك بعد بكل شي 

لا تحكمين على الشكل كثير بنات ندموا لانهم اختاروا صديقاتهم بالشكل 

في بنات فيهم الخير وبيساعدونك وبتصيرون أخوات وصديقات بدون مقابل 

صحيح صداقات المدرسه أوفى كثير برايي بس بعد صديقات الجامعه كنز أحسني اختياره 

نصيحتي الجامعه تحتاج أكثر من صاحبه وصديقه تفائلي واحسني الاختيار  .. والله يوفقكم يارب

 احبكم واحب دعمكم لي بكل بوست شكرا لكل من سوت ريتويت شكرا لكل من علقت وردت على البوست شكرا لكم كلكم من اعماق قلبي :$