ميك أب صباح العيد .. كل عام وانتم بخير

أهلاً أهلا بمتابعاتي .. كيفكم ..

 كل عام وانتم بخير .. مقدما .. 

اليوم بتكلم عن ميك أب صباح العيد  

للأسف بالعيد نشوف أشكال اوفر الصباح

للناس اللي تحب البساطه بيناسبهم الموضوع ..
خطوات بسيطة تطلعين بطله حلوه يوم العيد ..

نبدأ أولاً بتهيئة البشرة قبل المكياج 

تتحتاجين

1-مقشر  استخدمي المقشر قبل الميك اب بوقت بيعطي البشرة نضاره حلوة

2-غسول  لللوجة بعد المقشر ..

3-مرطب: رطبي وجهك باستخدام كريمك الصباحي قبل البرايمر ب5 دقايق

انتهينا من الخطوة الاولى

 بعد تهيئة البشرة

برايمر - بيوبا 

استخدمي برايمر يهيئ بشرتك للميك اب

فوائد البرايمر

يثبت المكياج لوقت اطول

يوحد لون البشره

يصغر مسامات الوجه 

يتحكم في لمعان البشره

 مهم في الصيف عشان لا يسيح المكياج

 انا استخدم برامير من  بيوبا اللي بالصورة فوق     

تقيمي له 6 من 10 

المنتج حلو يخفي المسامات الكبيره بنسبه 20% 

يعطي نعومة حلوه للوجه 

مشكلته لو زدت الكميه شوي بس يتقشر  من الوجه 

عني أنا ماراح اشتريه مره ثانيه 

السعر 86 ريال - دبنهامز 

بعد ما توزعين البرايمر كامل

عندك خيارين

يا تستخدمين بي بي كريم

أو فاونديشن

أنصح باستخدام 

 Hydra life من  ديور :
للناس اللي بشرتهم صافيه 

سواتش من النت 

فيه spf واقي شمس 20 .. تعتبر نسبه حلوه 
وبرضوا فيه كميه ترطيب  استغني عن المرطب

يناسب البشرة الخاليه من العيوب لان ما يغطي العيوب بشكل كامل  

التغطيو 3 من 5
سهل التوزيع .. سائل كانه مويه 

ما يكتل ابد ابد على البشره وهذا الشي مريحني 

أنا بشرتي جافه وحساسه 

اشتريته من 8 شهور 

الباكيج مشاء الله فيها بركة مو راضي يخلص 

الدرجات عندهم 3 درجات .. اغلبها برونزيه 

أنا اخذت الدرجة الاولى افتحهم وحسيت انه اغمق مني ب3 درجات تقريبا 

السعر 230 ريال .. تقريبا 

يتوفر في  : وجوه - دبنهامز - باريس غاليري - السواني 



ميك اب العيون 
بنستخدم
1- كونسيلر 
2- برايمر   
3- اي شادو 
4- الاي لاينر 

كونسيلر (خافي العيوب ) 

أنا استخدم كوريكتر من بوبي براون  بين البني والاورنج 

وبعدها استخدم كونسيلر من ميك اب فور ايفر 
ليه  استخدم 2 
لان هالاتي غامقه ولو استخدمت بس كونسيلر بيقلب اللون رمادي 
وتوضح الهالات بشكل بشع 

وقبل الاي شادو استخدم برايمر اربن دكاي 
يثبت الاي شادو لوقت اطول


نجي لاختيار الاي شادو للعين 
أنصحكم باختيار 
درجات الالوان الطبيعية 
شوفوا الصورة اللي تحت  لباليت نيكد 1 من اربن دكاي 
حددت الألوان الترابيه
احب استخدمها صباح 
ادمج لونين ودايم كسره الجفن استخدم اللون البني buck 

حاولوا تبعدون عن الاحمر ودرجاته والازرق والاخضر ووو الخ تعطي منظر بشع الصباح 

أمكان الشراء : 

كونسيلر ميك اب فور ايفر : من وجوه 

السعر 160 ريال 

كوريكتر بوبي براون 

طلبته من النت .. 120 ريال 

وموجود في هارفي نيكلز الفيصلية 

برايمير اربن دكاي + باليت نيكد 1 

طلبتهم من تاجرة بالاقلاع  البرايمر يجي مع الباليت 

للاسف ما يتوفر عندنا في السعودية 

 الايلاينر 

حاولي تكون رسمتك بسيطه وتبرز عيونك بشكل حلو 

شوفوا معي بالصورة 

أول 6 رسمات حلوات وتناسب الصباح 

انصح كل مبتدأه برسم العين 

تستخدم اي لاينر لانكوم 

شوفوا معي الصورة 

شفتوا كيف الرأس أفضل بكثير من الفرشه 

بيساعدك في رسم العين 

برضوا درجه السواد غامقة جدا 

وممكن إذا غلطتي بالرسمه تمسحينه بدون ما يبقع ويخرب كل شغلك 

السعر 160 ريال 

المكان : دبنهامز الرياض غاليري 

ولا تنسين ترسمين عينك من الداخل بأي كحل يناسبك 

البلاشر (أحمر الخدود ) 
حلو يكون خفيف ولون طبيعي بما أنه الصباح 

شوفوا معي الصورة الجايه طريقة توزيع البلاشر 
لكل أنواع الوجوه 

للعيد أنا اخترت بلاشر من ديور جميل جدا وخفيف 

متوفر في وجوه و باريس غاليري ودبنهامز 


الحواجب
 الخطوه اللي بتبرز جمال الميك اب 


ارسمي حواجبك بلون قريب من لون شعر الحواجب 
وبنفس التقاسيم الموجودة في الصورة 

صورة من قوقل 

واخيرا الروج 

نصيحتي ابعدي عن الألوان الصارخه الصباح 
الاورنج الفوشيا الأحمر تجنبيهم ممكن تستخدمينهم في مناسبات وطلعات الليل 

الصباح 
الوردي الفتاح والبيبي بينك واللحمي الألوان الطبيعة أحلى الصباح 
شوفي معي الصورة 

نبدأ من اليمين 

روج pink  من برجوا 
الدرجة : sweet kiss rose corset 
السعر من 60 إلى 80 ريال
موجود في : صيدلية بوتس.. وجوه .. سنتر بوينت ... دبنهامز الرياض غاليري 


الثاني من اليمين 
ريفلون 
اللون بين الوردي واللحمي وفي قلتر خفيف 
الدرجة 45  raspberry 
السعر : 45 ريال تقريبا 
موجود في : صيدلية بوتس.. وجوه .. سنتر بوينت ... 


الثالث من اليمين 
بوبي براون 
هو روج كريمي 
درجة  Italian Rose 9 
السعر من 180 الى 200 ريال 
موجود في هارفي نيكلز الفيصلية 
وممكن تطلبينه من النت 

الرابع من اليمين 
من شانيل 
قلوس حلو وخفيف 
الدرجه : 67 
موجود في : دبنهامز .. وجوه .. باريس غاليري .. 



بكذا اكون خلصت البوست 
وكل عام وانتم بخير .. ربي يتقبل منا صيامنا وقيامنا ويكتب لنا الخير في ليلة القدر