مستجده جامعيه ،، النظافه اهم من المظهر بمنتجات بسيطه

 مستجده جامعيه ،، النظافه اهم من المظهر بمنتجات بسيطه

 ياصباح السعاده والجمال لاجمل متابعات 

كيفكم وكيف تجهيزات الجامعه  نكمل سوا  سلسله مستجدة جامعيه

 بيكون موضوع اليوم عن النظافه الشخصيه

 الموضوع حساس شوي بس والله يستاهل نتكلم فيه... ولاني احبكم بتكلم فيه بتفصيل شوي

 كثير بنات غافلين عن هالموضوع كثير عانوا من صديقات

قلبوهم اطيب من الطيب

واشكالهم مرتبه وجميلين

 بس الريحه لا تعليق تخليك تنفرين منها غصب  وما تقدرين تجلسين معها

 ليه تكونين وحده منهم؟؟

كل المطلوب خطوات بسيطه ما تاخذ منك وقت 

 الجامعه مو مثل المدرسه جالسه بكرسيك وتنزلين للبريك وخلاص :(

 لا الجامعه تتنقلين من مبنى لمبنى بالحر ووتحت الشمس

وجسمك يفرز عرق يسبب روائح كريهه

 في بنات ما يحسوا بهذي الريحه لان خشمك تعود عليها

وبالتالي ما تحسين بس غيرك يتضايق منك وممكن تخسرين ناس بسبب اهمالك

خذيها قاعده المويه والصابون ما يسون شي لحالهم

في كم نقطه ودي اتكلم فيها اولا لازم تتروشين كل يوم وتستخدمين

1 -الصابون السائل( الشاور جل)

 لازم لازم لازم تستخدمينه يوميا كل يوم تاخذين شاور وتستخدمينه

 لان المويه ما تزيل العرق والبكتيريا اللي تسبب الريحه الكريهه

في خيارات كثيره عندك بس انصحك باستخدام صابون ديتول السائل للجسم

 قبل لا تستخدمين الشاور جل المعطر

 (اقصد بالشاور جل المعطر اللي هو غسول الجسم المعطر اللي من باث اند بودي وركس ومن بودي شوب ومن زهور الريف وشاور جل بنفس ماركه عطرك ووو الخ )

لان ديتول بيقتل البكتيريا وينظف الجسم وبعدها استخدمي الشاور جل المعطر لتعطير جسمك

 2-مزيل رائحه العرق (ديودرنت)

يستخدم مرتين في اليوم مره بعد الشاور ومره قبل تلبسين للجامعه

لا تقولون لي يسبب سرطان بعيد الشر و و و الخ

لا مزيل رائحه العرق يفرق عن مزيل العرق  كيف؟

مزيل رائحه العرق

 بتلاقين مكتوب عليه 7 ساعات

 وهو يزيل الرائحه

 مزيل العرق

 بتلاقين مكتوب عليه 24 ساعه

 وهذا يسكر المسام ويمنع العرق

 افضل المزيلات اللي استخدمتها

    

 مزيل ليدي سبيد ستيك برائحة التفاح

 يعطي شعور بالانتعاش جميل جميل

 يحسسك انك فريش وطبعا يزيل ريحه العرق الكريهه

 متوفر في كل الصيدليات والسوبرماركت

سعره من 13 الى 17 ريال

(أنا معتمده هذا الديودرنت من المتوسط مريح جدا )

 مزيل دوف

استخدمت نوعين الازرق وكان روعه وريحته خفيفه وفرش

 الثاني اللي غطاه ذهبي ريحته قويه وكرريهه ما حبيتها ابد

 سعره 12 ريال

 متوفر في كل الصيدليات والسوبرماركت

الصورة من قوقل 

مزيل بيزلين

هذا للناس اللي تقول نخاف من المواد الكميائيه مزيل طبيعي 100%

 ويبيض المنطقه اول ما استخدمه فيه ريحه غريبه 10 دقايق وتروح بس ما قدرت اتحملها

 انا اخذت اللي بدون رائحه يمكن اللي برائحه غير

سعره 46 ريال

يتوفر في   كل الصيدليات

* ما انصحك ابد بمزيلات معطره مثل مزيلات بودي شوب و نكتار وزهور الريف الخ

 *انصح باستخدام مزيل العرق على شكل بودره من كل المزيلات اللي ذكرتها فوق  ما عاد بيزيلين مافي الا رول 

لأن الرول السائل والبخاخ اقل تاثير

 3-ازاله شعر  الاندر ارام  (الابط)

الحلاوة 

المفروض كل اسبوعين تشيلين هذي المنطقه وتنظفينها

 لان شعر ومنطقه مكتومه بتسبب الريحه الكريهه

الليزر

 اذا قدرتي تسوينها ليزر وترتاحين برضوا افضل

  

شفرات

 ما تقدرين لا حلاوه ولا ليزر في موس من جاليت للبنات لونه أورنج

  بس ممكن يسبب لك سواد في المنطقه

شمع 

 شرائح شمع فيت سهله وفي نوع مخصص لهذي المنطقه

 سعر شرائح فيت 38 ريال

 تتوفر في كل الصيدليات والسوبرماركت الكبيره الدانوب كارفور بنده

 4- التقشير الخفيف 

انا لما اسوي تقشير لجسمي اخذ شوي من المقشر وامسح على منطقه الاندر ارام

 مسح خفيف مو فرك

تنظف المنطقه وتنتعش

استخدم مقشر سوب اند قلوري حلو وفي كميه ترطيب تكلمت عنه في بوست توحيد لون الجسم 

 العطر انتبهي تستخدمين عطر على عرق لان الريحه بتنشر مقرفه العطر على نظافه عشان يبين جمال ريحه خطوات بسيطه تخليك بنت نظيفه وانيقه

ملخصها بثلاث خطوات 1- شاور بالصابون 2- مزيل عرق يوميا 3-  وازاله الاندر ارام باستمرار

انتهى البوست 

مثل ما وعدتكم في البوست الأول كل بوست بكتب فيه كلمه لمستجدات الجامعه 

اليوم بتكلم عن صديقات الجامعه 

وانتي داخله الجامعه بتقابلين بنات اشكال وألوان 

من كل الطبقات وكل المستويات  .. لا تتعلقين بأول صديقات تقابلينهم أول الأيام 

دايم نسمع بنات الجامعه مصلحجيات ويدورون مصلحتهم 

هذا الكلام صحيح بنسبه 50% 

و وبالمقابل بعد في بنات بتحبينهم ويحبونك بدون مصلحه 

بتخلصين لهم بكل شي وبيخلصون لك بعد بكل شي 

لا تحكمين على الشكل كثير بنات ندموا لانهم اختاروا صديقاتهم بالشكل 

في بنات فيهم الخير وبيساعدونك وبتصيرون أخوات وصديقات بدون مقابل 

صحيح صداقات المدرسه أوفى كثير برايي بس بعد صديقات الجامعه كنز أحسني اختياره 

نصيحتي الجامعه تحتاج أكثر من صاحبه وصديقه تفائلي واحسني الاختيار  .. والله يوفقكم يارب

 احبكم واحب دعمكم لي بكل بوست شكرا لكل من سوت ريتويت شكرا لكل من علقت وردت على البوست شكرا لكم كلكم من اعماق قلبي :$